مرکزِ ولایتِ علی پاکستان سندھ

سربراہ
سید علی رضا جانی شاہ
سید علی رضا جانی شاہ مرکزِ ولایتِ علی پاکستان (سندھ) کے سربراہ اور ایک صاحبِ فکر، باعمل اور غیرتِ ایمانی رکھنے والی نمایاں شخصیت ہیں۔ ان کی زندگی کا محور آلِ محمدؐ سے بے لوث محبت، ولایتِ امیرالمؤمنین علی علیہ صلواۃ و السلام سے غیر متزلزل وفا اور حق کی سربلندی کے لیے ہر قسم کی قربانی دینے کا جذبہ ہے۔
فکری انتشار اور تشیع کے بنیادی عقائد پر منظم یلغار کے نازک دور میں، سید علی رضا جانی شاہ نے ذاتی مفادات، سماجی دباؤ اور دنیوی مصلحتوں کو یکسر نظرانداز کرتے ہوئے ایک جرأت مندانہ نظریاتی تحریک کو منظم شکل دی۔ ان کی قیادت میں مرکزِ ولایتِ علی پاکستان (سندھ) نے ولایتِ فقیہ، اجتہاد و تقلید غیر معصوم جیسے نظریات کے فکری و اصولی رد، وجوبِ ولایتِ مولا علی کے دفاع، عزاداریِ امام حسین کے تحفظ و فروغ، اور حرمتِ سادات کے مکمل دفاع اور حب الوطنی کو اپنی جدوجہد کے بنیادی ستون قرار دیا۔
سید علی رضا جانی شاہ کی قیادت کی نمایاں خصوصیت استقامت، فکری وضاحت اور بے خوف حق گوئی ہے۔ انہوں نے قرآنِ مجید اور احادیثِ معصومین کی من پسند و سیاسی تشریحات کے مقابل خالص مذہبِ آلِ محمد کی طرف رجوع کی دعوت دی اور فکری طاغوتوں کے سامنے ڈٹ کر کھڑے ہونے کی جرأت کو زندہ رکھا۔ ان کی رہنمائی میں یہ فکری جدوجہد پاکستان سے آگے عراق، ایران، شام، لبنان اور ہندوستان سمیت دیگر خطّوں تک نمایاں طور پر محسوس کی جا رہی ہے۔
بحیثیت لیڈنگ فگر، سید علی رضا جانی شاہ اس اصولی مؤقف پر قائم ہیں کہ الٰہی نظامِ حکومت صرف امامِ منصوص من اللہ، امامِ مہدی علیہ الصلواۃ والسلام (عجّل اللہ تعالیٰ فرجہ الشریف) ہی نافذ فرمائیں گے، اور دورِ غیبت میں کسی بھی غیر معصوم فرد، گروہ یا فقہی ڈھانچے کو یہ اختیار حاصل نہیں۔ وہ ریاست کے آئینی و قانونی نظم اور مذہب کے اخلاقی، فکری اور روحانی کردار پر یقین رکھتے ہیں، اور اسی اصولی سمت میں مرکزِ ولایتِ علی پاکستان (سندھ) کی قیادت کر رہے ہیں۔